Водич за патување

Совети за безбедно учество во сообраќај во зима – прилагодена брзина, безбедно растојание и контролирано управување.

110431326-25
Напишано од Пјер

Метеоролозите за почетокот на следната недела најавуваат ниски температури и снег. Овој период од годината актуелна е зимската опрема и управување моторно возило во услови на снег и мраз. Републичкиот совет за безбедност на сообраќајот на патиштата со корисни совети за  секој возач  како да  се управува возилото во зимски услови и на тој начин всушност  да ја обезбедите не само својата, туку и безбедноста на останатите учесници во сообраќајот.

За безбедно учество во сообраќајот, секој возач на своето возило треба да има наместено зимски гуми, а во гепекот од возилото  препорачливо е секогаш да има ланци соодветни на големината на гумите. (во случај да се користат летни гуми со минимална длабочина на шарите од 4 мм , носењето на ланците е задолжително).

Иако на возилото имате задолжителна зимска опрема и истото е технички исправно, секогаш имајте на ум дека снегот, лапавицата и мразот се многу опасни. Секое годишно време крие опасности кои возачите треба да ги знаат и да ги избегнуваат за да не направат грешки, но зимата е најопасна и бара од возачите голема вештина и присебност за да може соодветно да се справат со  неочекуваните и непријатни ситуации. Дури и да ја имате контролата над возилото, другите може да ја немаат,  затоа секогаш треба да бидете максимално внимателни и да возите со прилагодена брзина на условите на патот. Никогаш не се губете во лажното чувство на безбедност и применувајте ги следниве совети:

  • Трудете се, сѐ што правите додека управувате со возилото, да е нежно и лесно. Тргнете полека и ако осетите дека возилото ви пролизгува, само притиснете полека на педалата за сопирање и намалете го притисокот на педалата за гас.
  • Забрзувајте бавно, додавајте гас со ист притисок на педалата за гас, но со побавно и понежно отпуштање на педалата за кумплунгот. Менувањето брзини нека ви биде со најмногу 1/3 од максимално дозволениот број на вртежи, односно обидете се да го осетите возилото и да процените по звукот на моторот и по пролизгувањето на погонските тркала дали забрзувате исправно или сте дале премногу гас.
  • Кога ја намалувате брзината, настојувајте да намалувате полека, со моторот, со што помала употреба на ножната сопирачка.
  • Секогаш планирајте го патот, вртењето и запирањето. Возете бавно, оставајте поголемо растојание меѓу вас и другите возила.
  • Избегнувајте нагли движења со управувачот (воланот) кои можат да доведат до лизгање и до губење на контролата над возилото. Во населено место, движењето по сообраќајниците и по малите улички треба да е со мала брзина, додека на отворен пат, брзината треба да е до три пати помала од онаа со која би се движеле ако подлогата е сува.
  • Бидете секогаш концентрирани и никогаш не дозволувајте да ве фати паника! Во паника, возачите најчесто прават нагли движења со воланот и силно притискаат на педалата за сопирање. Сосема спротивно од правилото маневрите да се секогаш  нежни и лесни.

Применувајте ги советите на Републичкиот совет за безбедност на сообраќајот на патиштата и бидете безбедни во сообраќајот во  зимски  услови на патиштата.

Овој едукативен текст е во рамките на Зимската кампања која што РСБСП ја реализира со поддршка од МотоЦентар – Прв избор за гуми.  РСБСП во партнерство со Моторцентар  им посакуваат безбедни патувања на сите учесници во сообраќајот.

Зимата не дава шанса за избор. Опреми се!

За авторот

Пјер

Остави коментар